Question

زوجي يشك فيني هل أطلب الطلاق

زوجي شاك فيني ! زوجي يشك فيني ماذا افعل ! زوجي والشك !

أنا متزوجة من سنة ونصف وعندي مشكلة مرة متعبتني مع زوجي إلي هي الشك ، زوجي ما يشوفني على الجوال الإ ويقول وش معك أخاف أحد معك أخاف أحد يضحك عليك.
هذا الشيء ماينسكت عنه ايش اسوي خلاص مليت من هالموال هذا ليه يشك فيني !
و مرة قال والله والله لو أدري أن معك شيء راح افرغ المسدس في رأسك ، تبعت منه زوجي يشك فيني هل أطلب الطلاق أو فيه حلول ثانية لمشكلتي ؟

Comments

قد تكون غيرة ومن حبه لك يستمر بنصحك وتحذيرات انتبهي وكذا لأنه ممكن بيسمع عن قصص الخيانه وكذا وبرامج التواصل اللي يحصل فيها لذالك ممكن من باب الحرص  من اجل لاتدمر علاقتكم وقد يكون شك  بس على ماعرف الازواج تدور بينهم هالاسئله وانتي كن طمنيه واعطيه الجوال وين المشكلة

---

قولي له وليش تزوجت إن شاء الله عشان استر عمري ولا اقعد أدور للمغازل ياخي اكتشفت في رجال في قمة التخلف الله يصبر الحريم وبس

---

أشوفكم صافين كلكم معها ولا ماشاء الله فيه من نصحها تخلعه ولا تهرب منه أتقوا الله لا تخببون
وبعدين لو كان الوضع بالعكس كان بيكون هذا رأيكم يا ترى
اختي ليس شرطا أن يكون مريض قد تكون غيرته قوية عليك فطمني قلبه أنك تحبينه هو فقط بقولك وتصرفاتك وستنتهي مشكلتك
الله يوفقكم مع بعض

---

هالكلام خطير وزوجك ماكرره ألا لانك تساهلتي معه وصرتي تحلفي وتبرري واخذ راحته في الشك فيك
جوالك من خصوصياتك  لكن مايمنع تتركيه بدون باسورد واذا قال هالكلام ترمي الجوال عليه وتوبخيه على كلامه وشكه

Answer 1

اعطيه جوالك إذا قال هالكلام ، خليه يتطمن أن ما وراك شي ، الشك شي مدمر للعلاقات ، الله يكون بعونك

Answer 2

عووذه من النوعية هذي من الرجال أسحبي نفسك يا بنت واخلعيه هذا مريض بالشك وممكن يأذيك نفسياً وجسدياً وش لك بوجع الرأس دامك خفيفة ولامعك أطفال أشتري راحت بالك وأقلعيه من حياتك والله يعوضك بواحد أحسن منه

Answer 3

الله يعينك
اسمعي كلمي مستشاره تعلمك كيف توقفينه عند حده!
أن قال افرغ المسدس برأسك ، خذي عفشك وعلى بيت أهلك هذا يبي له رجال يربيه
ترا أن اسكتي له ولا رديتي بتبدين تخافين منه! ويبدأ يفسر خوفك انك مانتي مضبوطه !
ذولا ، لازم يتعالجون ، لازم قوه منك ع سنع وحكمه وخلي معك مختصه

Answer 4

نصيحه تركيه راح يدمرك اسأليني كنت عايشه مع كذا م ارتحت لين خلعته

Comments

أنتي شريتي راحت بالك الله يعوض عليك باللي أبرك منه :)

Answer 5

كلشي به علاج الا الشك والبخل

Answer 6

ما يشك الزوج في زوجته إلا لأنه راعي سوابق وعلاقات عشان كذا بلاه ربي في الشك لأقرب الناس له !!! الله يعينك

Comments

مو شرط أوقات من كثر ما يسمع الواحد من قصص
عموما الله يعافينا ولا يبلانا

---

آمين ،، بس أي علاقة مو مبنية على الثقة هي علاقة طابعها الفشل والمشاكل ،، عط زوجتك الثقة وحاسبها على الخطأ مو على الظن والشك

Answer 7

أنا ما بي أخبب بس أذا هددك ولا شك فيك دخلي أحد من أهلك ، هذا مرض ووش يفرغ المسدس عبده عنده. بعض الرجال ما يحترم إلا أحد يوقفه عند حده.

Answer 8

هذا مريض نفسي وحياتك في خطر معه نصيحة

Answer 9

شيكي ع جيوبه يمكن معاه حبوب شي

Answer 10

إذا استمريتي ساكته عليه بيشك أكثر لازم تصارحيه ويعرف انه غلطان واشتكيه على أهلك هذي فيها تهديد ممكن مره يحصل حاجه بالغلط ويسوي فيك جريمة

Comments

لا سلامات تشتكيه لأهلها .. غلط
أنصحك لا تخلينه يوسوس عادي قلي له شف جوالي حاولي تسوين انك تغارين عليه بيحس انك تحبينه ولا تبين غيره .. وكمان ادعي له ليل نهار يبعد الشك عنه تراه مرض ما يقدر يسيطر ع نفسه ومشاعره .

Answer 11

اثبتي له بشكل تلقائي وعفوي أن ليس لديك ما تخفينه
مثلا قومي لشغلك وخلي الجوال جنبه مفتوح وبدون رقم سري
دعيه يأخذ جوله فيه ويعرف انك بريئة براءة الذئب من دم ابن يعقوب
هذا إذا كان شخصاً سوياً
أما لو كان مريضاً نفسيا أو يتعاطى فلنا كلام آخر

Answer 12

لأنه مخبصها هو زمان وخايف عليك الحين
الرجال إلي يجي شكاك اعرفي انه مخبصها

Comments

يمكن يسمع السرابيت اللي حوله ويخاف على بيته

Answer 13

بعض الردود تطابق المثل الشعبي
بغى يكحلها وأعماها.
سيدتي صاحبة المشكلة فكري بطريقة أكثر إيجابية مثلا انه يحبك ويغار عليك .
طبعا لا راح يفرغ المسدس ولا شي لإنك عاقله

Answer 14

لا تنظرين أنها شك بالعكس ممكن يخاف عليك حقيقه خلي الجوال شي عادي إذا هو يحليك تتصفحين بجواله و ما يخبي عنك عادي خليه يقلب بجوالك لين يشبع  ضيفيه بكل البرامج اللي معك خليك واثقه و إذا سويتي اللي عليك وبقى على حاله  هذا ما ينصبر عليه

Comments

شلون يخاف عليها ويقول لو شاف عليها شي بيقتلها شلون تجي ذي !

Answer 15

نفس حركاتكم ماشاء الله تدورون وراء رجالكم وتفتشون جوالاتهم الحين صار شك والي تسونه انتم ايش تحري واستقصاء

Comments

وصلت في بعض الزوجات اذا ماصار الأغلبية ماهمً يشككون الا يبحثون ويسالون تقولين عيالهم اقل شي فيكم هذي التحريات طبقوها على عيالكم هم أولى بالتربيه والرعايه اما الزوج ماهمً محتاج احد يكون عليه ولي والله اكره الزوجه الي كذا تبحث وتفتش تقولين كونن ماهي زوجه

---

غباء اذا هو طيب معها وكل شي تمام ليش تبحث وراه والعكس صحيح بشرط انه هو ايضا مايقعد يشك فيها اما لو مثلا يبي جوالها بدون رمز ويقعد يشوف اللي فيه متى مابغى هذه تشرط عليه انه يفتح جواله عندها بعد

Answer 16

كل واحد يشوف الناس بعين نظرته لنفسه يمكن هو يضحك على الناس وخايف هذا الشيء يصير معاه طبعا

Answer 17

ليس الحب وحده كفيل لطمأنينة الحياة الزوجية ( مع أهميتها ) لأن الأهم ( الثقة بكل معانيها ) فأي حياة مستقرة وقد عدمت الثقة بين الزوجين أو أحدهما
قلب مكسور
للأسف من يستخدم أسلوب الشك مع زوجته يدل على خلل في شخصيته
وجه متأمل
أما تهديده الأرعن لكي بسلاحه فأرى أن تعيد النظر في علاقتك معه بلا مجامله

Answer 18

الحياة مع الشكاك لا تطاق
وغالبا الشك إما بسبب التصرفات المريبة
مثلا تطولين على الجوال وإذا قرب منك
يتغير وجهك أو تبعدين عنه الجوال
أو بسبب المرض
أو بسبب الماضي السيء للشكاك
فعليك بالابتعاد عن الريبة
وخليك واضحة
وإذا استمر فلابد من تدخل الأهل

Answer 19

الواحد م يمارس إسقاطات ع الشخص الثاني إلا هي موجوده عنده

Answer 20

لما قالك افرغ المسدس عليك كيف كملتي معاه؟ هذا واحد مجرم وممكن لو شك زيادة وصدق شكوكه يفرغ المسدس عليك بدون ما تغلطين!

Answer 21

كل واحد يشوف الناس بطبعه
عمومًا لازم يتلقى علاج نفسي

Answer 22

كل شخص يشوف الناس زي ما يشوف نفسه شوفي جواله أتلاقي مرقم كل البنات

Answer 23

الشكاااك قطعااا ،، حبيبتي هذا ماله حل اسأليني أنا ... خلاص هذا مريض مشى على كل سربوتات مدينتك فصار يحسب حتى بنات الرجال مثل اللي يعرفهم / أن كل البنات سوا وانه أي احد يقدر ينلعب عليهم زي ماسوا بهم

Answer 24

يمه ذا متجنن على الآخر اهربي اطلعي من حياته لا تضعين عمرك مع واحد مريض

Answer 25

اشغليه ونبشي وراه وعطيه نظرات لا قعد على الجوال لان غالبا اللي كذا يطلع وراه بلاوي ويحسب كل العالم مثله

Answer 26

المشكلة أن اكثر إلي يسون البلاوي أهاليهن واثقين منهن ولو ولي امرها قلبه تحرك وشك ١٪ يمكن ما سوت كذا ، وراعيات العيب هذي مواويلهن تشك فيني أنا متربيه أنا و أنا ؟؟؟ الله يستر علينا البعض يتستر بالتدين ، الله يصلح حال الناس

Answer 27

صيري صارمه معه وصارحيه أن مب عاجبك الوضع كذا وانك ما تقدرين تتحملين شكه.. إذا سكتي بيزود

Answer 28

كلن يرى الناس بعين طبعه

Answer 29

لا تسمحين له ابد يشك فيك وقفيه عنده حده لان الشك بهالشكل الجنوني يمكن يضربك أو شي اكثر

Answer 30

زوجك يمكن غير واثق من نفسه
اجلسي معه وتفاهمي بصراحة ووضوح وبهدوء
وضحي له معنى كلامه انه اتهام وعدم ثقة و هالأسلوب غير مرضي لأي إنسان وبأسلوبه يصنع حاجز نفسي كبير
والشك مفسد جدا هل عنده مشكلة أو سوء ظنه خلاه شكاك
هذي بتوصلين لها أثناء نقاشك معه

Answer 31

إذا كان زوجك غير متعاطي هذه الحبوب التي تُذهب العقل فتأكدي من ماضيك ربما لاحظ عليك تصرفات مريبة عشان كذا قام يشك فيك..