Question

زوجي يسبني

زوجي سبني ! زوجي سليط اللسان ويسبني على الطالعة والنازلة !

انا متزوجة من 5 سنوات ومتزوجة من زوجي سليط اللسان يسب ويشتم عل الطالعة والنازلة لازم لو مر من عنده واحد من أطفاله سبه هذي في حالة أنه كان مروق.
وإذا كان زوجي معصب عاد أدهى وأمر كرهنا في عيشتنا لا خرجات ولا سفريات حتى اهلي يسبهم حسبي الله عليه وانا مقررة إني انفصل علشان نرتاح ولكن سؤالي هل الأطفال إذا عاشوا في بيت مستقر مع الأم فقط بيرتاحون والأ ماراح استفيد وبتتعب نفسياتهم نفس وضعهم الآن ؟

Answer 1

أحرميه من النعمة اللتي بين يديه لفترة
فسليط اللسان علاجه التجاهل
أجعليه يشعر وكأنه فقد الجميع من حوله
نعم أنا معك ولكن ليس الطلاق وإنما الانفصال المؤقت فقط
فأولادك ليسو بخير معه وليس بأب جيد
لأول مرة أقولها زوري عند اهلك زيارة تأديبية له ليعتبر
ثم أرجعي بيتك تحت شروطك

Answer 2

اكيد معك افضل ومراعاة نفسيات الأطفال حتى لا تتدمر حسبي الله على كل رجل يحترم الناس برا البيت ويهين اهله لاجا بيته مايدري انه بهالدنيا ضيف ممكن بأي وقت يرحل ومحد نافعه غير دعوة عياله ولو كرهوه راح يصدقون عشان فرحة موته و لا يذكرونه إلا بكل شر

Comments

هل بحثتي عن السبب ؟ لماذا لايكون السبب انتي اللتي وصلتي به إلى هالدرجه من العصبيه والنفرزه ؟مافيه دخان من غير نار !اتوقع خل المشكله بيدك لكن اقتباس دور البريئه المظلومه واتهمتي زوجك باافعالك اللتي أوصلته إلى هالحاله ....

Answer 3

عطيه آية ( ما يلفظ من قول الا لديه رقيب عتيد )
وبخف يحتاج تعود
لانه لسانه عطول تعود عالسب والشتم
خله يتعود عالكلام الطيب وحبه حبه بتغير
إذا انفصلتي عيالك بيضيعون وانت أدرى

Comments

على أساس انهم مستقرين الحين ؟ اهم شي الأمان النفسي إذا الاب اخلاقه سيئة بالله كيف بيطلعون الأطفال إلي ببيئته المفترض دورات تعقد قبل الزواج عشان المرضى النفسيين يخيسوون عند.اهليهم ويطلعون عقدهم بالمرايا لا طفش يروح يسب ويشتم نفسه بدال ما يبهذل بنت الناس

Answer 4

سليط اللسان إذا وجد من يستمع إليه يتمادى لما يبدأ بالكلام ويسب اتركي له الغرفة دائما أولا تجاهلك راح يقتله ثانيا راح تنهز ثقته بنفسه وأنك ما تهتمي لكلامه وراح يتغير بس لو تغير ورجع خليك على نفس الطريقة وعيالك نفس الشيء حاولي تحلي الموضوع يمكن يتأدب لأن الانفصال صعب للأطفال

Answer 5

إلا الكرامة
أي علاقة حتى الزواج ب التعود
من فضلكم عودوا حالكم بوضع حدود ف علاقتكم حتى مع الزوج
كل شئ حسب التعود
يا جماعة الخير إلا الكرامة
الكرامة خط احمر
إذا ضاعت الكرامة ضاعت الحياه
 بالله أخبريني ما تبقى معك بعدها ؟

Answer 6

بالعكس يمكن الحين تعبانه نفسياتهم من لسانه

Answer 7

سأل مجرب ، كل يوم اتمنى واقول ليش امي مانفصلت ، هي ياعمري ببالها كذا احسن واريح لنا. بس بالحقيقة لا ، الاطفال يحسون ويفهمون كل شيء

Answer 8

أعانك الله ونصرك عليه أو أنقذك منه ومن شره ...الأطفال مراح يصير فيهم شيء باالعكس إذا عاشو مع أب زيك كذا راح يطلعون معقدين.

Answer 9

انفصال الآباء افضل لنفسية الأطفال من العيش في بيئة غير مستقرة أو تحت ضغوطات كالصراخ والشجار المستمر

Answer 10

إذا الاب مثل ماوصفتي صدق ذا بيدمر نفسيتهم مريض الله يكون بعونك

Answer 11

فهمي عيالك لاشافوه دخل كل واحد ينشغل بشي لايكونون عنده خلوه لحاله يدخلون غرفهم و بالصالة لايشوفهم خليه مع نفسه لو طول لسانه اسكتي احقريه لوعندك اهل كفو اسحبي عيالك وروحيلهم فترة تأديبية واذا طالب فيكم حطي شروط لرجعتك انه لو طول لسانه على عيالي وعلي اخر مابينا

Answer 12

لوعندك مقدرة مالية كلميه وقليله أن ماتسنعت مع السلامة ان ماحترمتني وش الفائدة الي لقيتها منك جالسة اخدمك وتسبني وتهين عيالي الله لايحدني على هذي الحياة لاتظهريله ضعفك قليله سكوتي عنك ماهو ضعف مني كثر ماهو عشان عيالي مايتأثرون لكن خلاص نفذ صبري

Answer 13

حاولي بشتى الطرق تصلحي منه الطلاق اخر الحلول منه يصلح انسان على يديك ويصلح لعياله ونفسه

Answer 14

غلط تنفصلي بسبب تافه جدا وتضيعي اطفالك وتتحملي تربيتهم ومرمطه مالها داعي الحل بنظري هالنوعيه لسانها من خلق الله وسخ حاولي تتجنبي اثارته وكمان ذكريه بحرمة اللي يعمله وان مافاد دخلي ابوه امه احد له قدره على تأديبه وإن مانفع فصبرا جميلا لأجل عيالك ولعل الله يحدث بعد ذلك أمرا.

Comments

لا مو سبب تافه ابدا بس يمكن الطلاق يكون شوي كبير بس تادبه تتركه فتره تروح عند اهلها تبلغه بانها راح تتطلق اذا اذا ماتادب لين يتربى ويتعلم

---

وإذا ماتأدب ولاتغير؟

---

عندي صديقه لي كانت تشكتي من لسان امها وابوها وكانت ترد عليهم وتتطاول بلسانها عليهم وهي تجي تقول لي ودي مااقول احيان امسك نفسي ماابغى ارد خوفا من الله بس احيان مااتحمل قالت كلمه مستحيل انساها انو لو ربي ماسامحني  على طولة لساني عليهم فجعل ربي مايسامحهم على انهم خلوني اقول كذا

---

عشان كذا لو ماتادب لابد من الطلاق عشان نفسيه الأطفال وعشان ماينجبرون بعدين يكرهون ابوهم او يغلطون عليهم بالكلام

---

ممكن الكلام سهل لكن الفعل صعب الاب مهما كان يظل افضل للطفل من عدم وجوده وفي طرق وطرق تحمي عيالها من الكلام السيء لكن الطلاق بيدمرهم اكثر اتحمل الكلام السيء ولايتطلقوا وشوفي الواقع لاتبعدي ..اللي تطلقوا كيف عيالهم غالبا الطلاق تدمير لنفسية الطفل

---

وغالبا الطلاق يكون افضل حل اتكلم بشكل عام
انا ماانصحها بطلاق او شي لاني مااعرف طبيعة حياتها بس الله يصلح زوجها ويهديه يارب

---

الطلاق حل للي تستحيل الحياه معاه راعي مخدرات والا زوج يضرب ليل ونهار صبح ومساء والا زوج مسوي مصيبه لاتغتفر ، اما مثل هالسبب وغيره فلي فيه وجهة نظرامين يارب وللمسلمين اجمعين

---

هذا يستحيل معه الحياة كرامتها فوق كل اعتبار وراحتها وراحة اطفالها واستقرارهم النفسي في عدم وجود مثل هالأب لان الاطفال نفسياتهم تدمر مع سوء الاخلاق والمعامله اصلا يكبرون يصيرون اقشر الخلق بسبب التربيه وافعال الاب الافضل لها تترك البيت وتستقر الا ماينصلح حاله واذا استمر تطلق اكيد

---

الطلاق بهالسهولة صار ؟

---

إذا كان غير محترم فلابد من الطلاق لان الاحترام أساس الحياة الزوجية إذا فقد خلاص انتهى

---

الاحترام مهم لكن الحياه الزوجية فيها حلول كثيره قبل الطلاق ..الطلاق تأثيره على الأطفال سلبي اكثر بكثير من لو صبرت الزوجة على الزوج.

---

لا والله حلوه ذي مطلوب منها تصبر وتضحي بعمرها وتدفن نفسها عشان نفسيات الاطفال اللي اصلا راح تزداد سوء لو استمروا مع اب لسانه متبري منه وغير محترم هالشي يعكس عليهم بعكس لو انفصلت يتربون ببيئه هاديه حتى نفسياتهم تتعدل الطلاق في هذي الحاله افضل من البقاء لها ولأطفالها

---

مو شرط يزداد سوء .. الاب مايتعوض حتى لو كان فيه صفات سيئه ..دام انه ماهو راعي مخدرات او خراب ..الطلاق ماهو سهل

---

هذي وجهة نظرك وانت حر فيها بس بكره اذا جت بنتك اكيد بتغير رأيك الاهل ماخلفوا عشان ينهانون بناتهم

Answer 15

عشان سب بتطلقي؟
وذكرتي لا خرجات ولا سفريات
اتوقع لو يسفرك ويسب كان عادي
وبعدين ع حسب سبه
اذا سب قوي واهانه واستحقار
علمي اهلك وحليها ودي
مافي داعي تهدمي بيتك عشان لسانه
بكره تتزوجي واحد يكون سكران او يهددك بالقتل
او يكون شاذ والعياذ بالله
وتقولي ياليت صبرت ع ابو لسان.

Comments

السب عادي يعني والكرامه وين اعتقد اهلها ماتعبوا عليها عشان يجي واحد يستنقص منها ويسب فيها وينهي كرامتها اساس الحياة الزوجيه الاحترام وطيب العشره والمعامله الحسنه اذا فقدت انتهى الزواج كيف تستهين وتقول عشان سب!!لهدرجه مافي حشيمه ولاكرامه

Answer 16

والله ما اقدر اقول شئ انا ك رجل زوجك موب رجال و حرام العيشة معاه عيالك بيتئثرون بئسلوب ابوهم