زوجي اذا رحت لاهلي مايكلمني ! زوجي حطني عند اهلي وينساني ! زوجي يفرح اذا رحت لاهلي ! زوجي يطنشني اذا رحت لاهلي ! زوجي مايشتاق لي اذا رحت لاهلي !
من البداية لا تعودينه على بعدك لا تغبين عن البيت شهور وإذا كنتي في البيت حسسيه بوجودك ، علشان إذا غبتي عنه يفقدك انتِ قلتيها طيب و حنون يعني يستاهل انك ما تبعدين عنه صدقيني مفتاحه سهل بس يبي له شويه اهتمام زيادة.
اتوقع اغلب الرجال كذا يحس اهم شي عنده انه يقضي لوازم البيت والمشاوير ويسكت زوجته بساعة احس ماينتبهون لتصرفاتهم يهتمون للي حولهم اكثر من الزوجه
احمدي الله أنه معطيك حريتك في الذهاب لبيت أهلك متى شئت، كثيرات لهن قضايا في المحاكم بسبب منع الزوج لها من زيارة أهلها. أصلح الله حالكما.
يمكن لأنك كثيرة الروحة لأهلك وماتجلسين في بيتك وتهتمي فيه فأصبح وجودك في حياته زي عدمه لاتهملي زوجك وارجعي اهتمي فيه وخففي زيارات اهلك
قد يكون السبب انتي فابحثي عن السبب ؟
استقري فبيتك اذا انتِ عايشه اغلب الأيام عند أهلك كيف يكون استقراركم الأسري؟ الزوجة مسؤولة عن صنع الاستقرار والحياة الحلوة والنظام المرتب فبيتها زوجك ممكن متعود انك تجلسي عند اهلك ومطمئن عشان كذا مايسأل وممكن متزوج غيرك وممكن هو كمان يشغل نفسه لمن تروحي عند أهلك ( احتمالات واردة )
والله اللي تتزوج وبعدين تجلس عند اهلها افضل لاتتزوج .. الواحدة إذا تزوجت خلاص مكانها في بيت زوجها وتزور أهلها زيارة فقط مو كل شوي وهي عند اهلها اصلا عيب مازوجوها اهلها الا عشان تقعد في بيتها مو كل شوي ناطه عند اهلها .
واضحه وصريحه يلقى نفسه اذا انتي عند اهلك شوفي وش الوضع وحاولي تتقربين له اكثر وتفهمينه
مادام طيب وحنون لا تكثرين من الروحة لبيت أهلك !اجلسي ببيتك ! أحس الخطأ عندك ليه تجلسين عند اهلك مده طويلة ! قللي الروحات والزمي بيتك خليه يعتاد جو الحياه الزوجية السعيدة ، وبإذن الله تريّن ما يسرك.
اعتقد إذا الزوجين بينهم مودة وحب ما راح يبعدون عن بعض كثير ، والزوجة المسؤولة تجلس في بيتها وتفصل حياتها عن أهلها ، إلا أن كان فيه سبب يخليها تفضل بيت أهلها على زوجها !
ما يهتم أتوقع من البرود إلي حاصل بينكم وممكن عنده مشاكل او ظروف مأثرة على نفسيته قللي الذهاب لأهلك وحاولي ما تباتين عندهم وغيري الروتين وجددي في نفسك والبيت والسوالف حاولي تسوين اكشن في البيت وجو حلو يخلي لك شوق في بعدك
إذا كان عاقل وكريم معك وطيب وحنون فيمكن يكون يحب الانفراد بنفسه كثيرا وهذا ماهو عيب. احمدي ربك انه جمع بين صفتين جميلتين: انه يقدرك وحنون معك وانه يترك الحرية تجلسين مع أهلك. وليس من الأزواج الذين تكثر حولهم الشكوى بحيث يكون بخيل وقاسي ولا يسمح لها بالخروج ولا إلى أهلها.
عادة السلوك ليس المشكلة ، فهو ترجمة لشيء خفي المشكلة قد لا تكون فيك أو فيه، لكن في علاقتكما نفسها وحدة عانت من نفس المشكلة ، وبعد مصارحته في الوقت والمكان المناسب قال لها أنه كلما يخرج معها يتحول الحوار الى خصام ، فقام بتجنبها آملا أن تتغير مع الوقت تناقش الاثنان وغيرا الطريقة
من اكثر ما يحيرني أن الزوجة لازم تروح عند أهلها كل أسبوع أسبوعين وتقعد بالأيام عندهم ليش ؟ طيب وين استقرار الأسرة والبناء كيف يسير طبعا ما أقول اقطعي اهلك أبدا لكن زيارة كم ساعة بدون مبيت أنتو قاعدين تتفننوا بطرق الفراق والتعود عليه لا تقعدي عند اهلك إلا ساعات للزيارة
بسيطه لا تطولين بيت اهلك وعطيه العلم زياره وقضينا وإذا مره بتنامين يومين كفاية ليه أسبوع واكثر نصيحه اهتمي بيتك وزوجك واحتويه لا يطير من يدك بسبب إهمالك واضح انه تعود على روحاتك الكثيرة وصار الوضع ما عاد يفرق معه لو تجلسين معاه اكثر من جلستك عند اهلك راح تفهمينه وتلقين أجوبة لأسالتك
أول شي بعض الناس بارد وأنا منهم وانا واحد من الناس اللي يستأنسون مع نفسهم ما اسأل عن أحد أبد الا بعد فتره طويله اهلي يتعبون مني لكن زوجتي الحقيقه جالسه ببيتي ومتعود على وجودها احبها وتحبني لكن ماتعرف تفهم جوي اني احب استفرد مع نفسي لأن الأنثى ليس في قاموسها هذا الشعور وثانياً لو زوجتي تسوي مثلك راح انبسط لكن يردني الحياء وكلام الخلق ومشاعر زوجتي اللي اكيد تحب اني افتقدها ولا لو أمشي بطبعي بلا مبالاه كان استأنست مثل صاحبنا بالقصة والحقيقه ان البرود وعدم الشعور بالآخرين طبع سيئ لكن الخلق هذول عندهم فضول كبير للمعرفه وينفعوا يكونوا علماء وباحثين ومستكشفين لما يجدون في انفسهم من متعة الإستكنان والإنغماس في ماهم عليه من حب المعرفه والبحث والإستكشاف والإطلاع وهذه الفئة تفتقد الذكاء الإجتماعي هكذا هم وللأسف دائماً ماتُرمى بالفضول واللقافه في مجتمعاتنا بينما هم من يبحث ويكتشف ويخترع في الدول المتقدمة نصيحتي لك تقربي من زوجك ولكن لاتنسي ان تعطيه مساحه يمارس فيها هوايته وهي جلوسه مع نفسه ضبطيله شاهي وابعدي عنه خليه بجوه لاتصيري ناشبه بحلقه زي كثير من الزوجات اذا حب زوجها يستفرد بنفسه تكيله بكل الإتهامات انت ماتحبني انت ماتبيني انت ماتسولف معي انت وانت او اقل شي اذا هي ساكته لازم توريه نفسية عدم الرضى وهذا شي يزيده بعد بل بالعكس ارضي فيه وليس معنى كلامي ان الزوج ياخذ راحته تماماً بحيث لو جلس اسبوع ماهمه احد ولا ذكر اللي حوله بل لابد ان يستحي ويخجل ويعطي كل ذي حقٍ حقه ومثل ماقال نبينا عليه الصلاة والسلام ( سددوا وقاربوا )